Бо муаллифии олимони шинохтаи Институти давлат ва ҳуқуқи Академияи миллии илмҳои Тоҷикистон академики АМИТ Маҳмудзода М.З., узви вобастаи АМИТ Раҳимзода М.З., доктори илмҳои ҳуқуқшиносӣ Абдуҷалилов А., номзади илмҳои ҳуқуқшиносӣ Шонасриддинов Н. монография бо номи «Назария ва амалияи танзими ҳуқуқии муносибатҳои хусусӣ дар Ҷумҳурии Тоҷикистон» (Теория и практика правового регулирования частных отношений в Республике Таджикистан». Коллективная монография. Душанбе: ИУ "Дониш", 2026. - 394 с.) аз чоп баромад.

Муқарризони монографияи мазкур профессорон Сангинзода Д.Ш. ва Раупова М.Т. мебошанд

Ин асар ба 35-солагии Истиқлолият бахшида шуда, фарогири 5 боб мебошад:

БОБИ 1. НАЗАРИЯ ВА АМАЛИЯИ ТАНЗИМИ ҲУҚУҚИИ МУНОСИБАТҲОИ ХУСУСӢ.

БОБИ 2. ТАҲҚИҚИ МУНОСИБАТҲОИ НАВИ ИҶТИМОИЮ ИҚТИСОДӢ ДАР СОҲАИ ТЕХНОЛОГИЯҲОИ РАҚАМӢ.

БОБИ 3. НАЗАРИЯИ МУНОСИБАТҲОИ ЭЛЕКТРОНӢ ДАР СОҲАИ ТЕХНОЛОГИЯҲОИ ИТТИЛООТӢ.

БОБИ 4. ТАҲЛИЛ ВА БАРТАРАФСОЗИИ ЗИДДИЯТҲОИ ДОХИЛИИ ҚОНУНГУЗОРИИ АМАЛКУНАНДА, КИ МУНОСИБАТҲОИ ХУСУСИИ ҲУҚУҚИРО ТАНЗИМ МЕКУНАД.

БОБИ 5. РУШДИ МУНОСИБАТҲОИ НАВИ ҲУҚУҚИИ МУНОСИБАТҲОИ ХУСУСӢ.

Монография барои олимон, аспирантҳо, донишҷӯёни факултетҳои ҳуқуқшиносӣ, кормандони соҳаҳои хоҷагидорӣ ва ҳамаи онҳое, ки ба ҳуқуқи хусусӣ таваҷҷуҳ доранд, тавсия мешавад.

21 августи соли 2026 дар доираи конференсияи ҷумҳуриявии илмӣ-назариявӣ бахшида ба 35-солагии Истиқлоли давлатии Ҷумҳурии Тоҷикистон дар мавзӯи «Истиқлоли давлатӣ: ташаккул ва танзими ҳуқуқӣ» Институти давлат ва ҳуқуқи Академияи миллии илмҳои Тоҷикистон чорабинии тантанавиеро баргузор намуд.

Дар ин рӯз барои дастовардҳои меҳнатӣ кормандони институт ва барои ҳамкории судманд меҳмонони ҳамоиши илмӣ ба Ифтихорномаи Институти давлат ва ҳуқуқи АМИТ сарфароз гардонида шуданд.

Дар арафаи 35-солагии Истиқлоли давлатии Ҷумҳурии Тоҷикистон Институти давлат ва ҳуқуқи Академияи миллии илмҳои Тоҷикистон монографияи бунёдии «Эмомалӣ Раҳмон — эҳёгари низоми ҳуқуқӣ ва давлатдорӣ дар Тоҷикистон» (Душанбе: МН "Дониш", 2026. -263 саҳ.)-ро нашр намуд.

 Муаллифон:
• Мирзозода Парвон Зайналобуддин — директори институт, доктори илмҳои ҳуқуқшиносӣ, профессор;
• Сангинзода Дониёр Шомаҳмад — муовини директор оид ба корҳои илмӣ ва таълимӣ, доктори илмҳои ҳуқуқшиносӣ, профессор;
• Бобоҷонзода Исрофил Ҳусейн — мудири шуъба, доктори илмҳои ҳуқуқшиносӣ, профессор;
• Қодирзода Тоҳир Қамар — сарходими илмӣ, доктори илмҳои ҳуқуқшиносӣ, дотсент.

 Муҳаррири илмӣ:
Хушвахтзода Қобилҷон Хушвахт — Президенти Академияи миллии илмҳои Тоҷикистон, академик, доктори илмҳои иқтисодӣ, профессор.

 Муқарризон:
• Зоир Ҷурахон Маҷид — мудири шуъбаи масоили мубраими илмҳои ҳуқуқи конститутсионӣ, доктори илмҳои ҳуқуқшиносӣ, профессор;
• Азизода Убайдулло Абдулло — мудири кафедраи назария ва таърихи давлат ва ҳуқуқи факултети ҳуқуқшиносии Донишгоҳи милии Тоҷикистон, доктори илмҳои ҳуқуқшиносӣ, профессор.

 Монография аз 12 боб иборат буда, мавзӯъҳои зеринро дар бар мегирад:

• Саҳми Пешвои миллат дар эҳёи низоми ҳуқуқӣ ва давлатдории тоҷикон;

• Эмомалӣ Раҳмон — асосгузори истиқлоли давлатӣ ва бунёдгари давлати навини тоҷикон;

• Нақши паёмҳои Президент дар эҳёи афкори сиёсӣ, фарҳанги ниёгон ва рушди илми ҳуқуқшиносӣ;

• Нақши паёмҳои Президент дар ташаккулёбии маърифати ҳуқуқӣ;

• Мактаби давлатдории Эмомалӣ Раҳмон — намунаи барҷастаи тарбияи ватандӯстии шаҳрвандон;

• Пешвои миллат ва ташаккули сиёсати ҳуқуқӣ дар Тоҷикистони соҳибистиқлол;

• Эмомалӣ Раҳмон — Асосгузори сулҳу ваҳдати миллӣ, Пешвои миллат;

• Худшиносӣ ва худогоҳии миллӣ ҳамчун омили калидии ҳифзи истиқлол, ваҳдати миллӣ ва пойдории ҳуқуқии давлат;

• Саҳми Пешвои миллат дар ташаккули дипломатияи экологӣ;

• Амалисозии ҳадафҳои ободкорӣ ва созандагӣ дар сиёсати ҳуқуқии Ҷумҳурии Тоҷикистон;

• Пешвои миллат — рамзи пойдориву бардавомии давлатдории мустақили тоҷикон, кафили сулҳу ваҳдати миллӣ ва меъмори давлати ҳуқуқбунёд;

• Модели Тоҷикистони навин — самараи таълимоти ҳуқуқии Пешвои миллат.

Монографияи мазкур саҳми бунёдии Пешвои миллат, муҳтарам Эмомалӣ Раҳмонро дар эҳёи низоми ҳуқуқӣ ва давлатдории тоҷикон, аз барқарорсозии сулҳ баъди ҷанги шаҳрвандӣ то таҳияи Конститутсия, кодексҳо ва беш аз 400 қонунҳо, ки заминаи давлати демократӣ, ҳуқуқбунёд ва дунявиро дар Тоҷикистон фароҳам овардаанд, таҳлил менамояд.

Ин нашр ҳадиёи арзанда ба 35-солагии Истиқлоли давлатии Ҷумҳурии Тоҷикистон мебошад!

21 августи соли 2026 дар Институти давлат ва ҳуқуқи Академияи миллии илмҳои Тоҷикистон конференсияи ҷумҳуриявии илмӣ-назариявӣ бахшида ба 35-солагии Истиқлоли давлатии Ҷумҳурии Тоҷикистон дар мавзӯи «Истиқлоли давлатӣ: ташаккул ва танзими ҳуқуқӣ» баргузор гардид.

Дар конференсия олимони варзидаи соҳаи ҳуқуқ, докторон ва номзадони илм, намояндагони Маҷлиси намояндагон ва Маҷлиси миллии Маҷлиси олии Ҷумҳурии Тоҷикистон, мақомоти ҳифзи ҳуқуқ, инчунин ҷавонони муҳаққиқ ва докторантони PhD аз гӯшаву канори кишвар иштирок намуданд.

Бо сухани ифтитоҳӣ директори Институт, доктори илмҳои ҳуқуқшиносӣ, профессор Парвон Мирзозода, ноиби президенти академия, ноиби Президенти Академияи миллии илмҳои Тоҷикистон, доктори илмҳои филологӣ, профессор Маҳмадовуд Саломиён, намояндагони Маҷлиси намояндагон ва Маҷлиси миллии Маҷлиси олии Ҷумҳурии Тоҷикистон, мақомоти ҳифзи ҳуқуқ баромад намуданд.

Дар рафти мавзуҳои пленарӣ ва бахшҳо масъалаҳои муҳимтарини имли ҳуқуқшиносӣ баррасӣ шуданд, аз ҷумла: ташаккул ва рушди давлатдории миллӣ; нақши тарбияи ҳуқуқӣ дар таҳкими давлати ҳуқуқбунёд; нақши зеҳни сунъӣ дар ҳуқуқ, рақамикунонӣ ва ҳифзи ҳуқуқи шаҳрвандон; ҷанбаҳои таърихӣ-ҳуқуқии Истиқлол; масъалаҳои ҳуқуқи оилавӣ, соҳибкорӣ, ҷиноятӣ ва байналмилалӣ ва дигар мавзуъҳои мубрам.

Мавзӯи 35 соли Истиқлоли давлатии Ҷумҳурии Тоҷикистон: таҳлили ҷанбаҳои байналмилалӣ-ҳуқуқӣ (профессор Раҷабов Саидумар Одинаевич), масоили мубрами ҳуқуқи ҷиноятии Ҷумҳурии Тоҷикистон дар марњилаи Истиқлолияти давлатӣ (профессор Шарипов Тақдиршоҳ) ва мероси илмӣ-фалсафии Абунасри Форобӣ ва Абуалӣ Ибни Сино: нақши Тоҷикистон дар эҳё, таҳқиқ ва муаррифии он (Дотсент Амондуллоев Бегмурод Саломатуллоевич) аз ҷумлаи мавзуҳои ҷолибе буд, ки таваҷҷуҳи иштирокчиёни ҳамоишро ба худ ҷалб намуд.

Дар умум дар конференсия масоили муҳими давлат ва ҳуқуқ дар даврони 35 соли Истиқлоли давлатӣ баррасӣ гардида, қатънома бо тавсия ва пешниҳодҳо қабул карда шуд.

Санаи 21 августи соли 2026 дар доираи конференсияи ҷумҳуриявии илмӣ-назариявӣ бахшида ба 35-солагии Истиқлоли давлатии Ҷумҳурии Тоҷикистон дар мавзӯи «Истиқлоли давлатӣ: ташаккул ва танзими ҳуқуқӣ» Институти давлат ва ҳуқуқи Академияи миллии илмҳои Тоҷикистон рӯйнамоии маҷаллаи илмии "Давлат ва ҳуқуқ", инчунин монографияҳои зеринро баргузор намуд:

 "Эмомалӣ Раҳмон — эҳёгари низоми ҳуқуқӣ ва давлатдорӣ дар Тоҷикистон"
 " Ташаббусҳои қонунгузории Президенти Ҷумҳурии Тоҷикистон Эмомалӣ Раҳмон - омили пойдории давлатдории миллӣ"
 "Проблемаҳои назариявии фаласафаи ҳуқуқ"
 "Судебные и квазисудебные институты в истории таджикской государственности

21 августи соли 2026 Ҷабборов Фарҳодҷон Нозимович – номзади илмҳои ҳуқуқшиносӣ, ходими пешбари илмии шуъбаи илмҳои ҳуқуқи байналмилалӣ ва Амирхониён Малика – ходими илмии шуъбаи илмҳои ҳуқуқи байналмилалии Институти давлат ва ҳуқуқи Академияи миллии илмҳои Тоҷикистон дар барномаи «Тафаккури созанда»-и Радиои Тоҷикистон бо ровигии Фазилати Иброҳим дар мавзӯи «Дастовардҳои занону духтарон дар даврони истиқлолият» мусоҳиба анҷом доданд.

Дар ҷараёни суҳбат масъалаҳои муҳими марбут ба баробарии гендерӣ, кафолатҳои ҳуқуқу озодиҳои занон, заминаҳои конститутсионӣ ва қонунгузории Ҷумҳурии Тоҷикистон дар самти ҳифз ва дастгирии занону духтарон, инчунин нақши онҳо дар рушди давлат ва ҷомеа мавриди баррасӣ қарор гирифтанд.

Зимни мусоҳиба таъкид гардид, ки дар даврони соҳибистиқлолӣ бо сиёсати пайгирона ва дастгириҳои пайвастаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барои баланд бардоштани мақоми зан дар ҷомеа, таъмини иштироки фаъолонаи онҳо дар идоракунии давлатӣ, илм, маориф, тандурустӣ, иқтисод, фарҳанг, соҳибкорӣ ва дигар бахшҳои ҳаёти ҷамъиятӣ шароити мусоид фароҳам оварда шудааст. Имрӯз занону духтарони тоҷик бо донишу малака, масъулиятшиносӣ ва ташаббускорӣ дар пешрафти Тоҷикистони соҳибистиқлол саҳми арзанда мегузоранд.

Ҳамзамон, масъалаҳои бартараф намудани қолабҳои гендерӣ, тақвияти маърифати ҳуқуқии аҳолӣ, фароҳам овардани имкониятҳои баробар барои занону мардон ва дастгирии ташаббусҳои созандаи занону духтарон муҳокима гардиданд. Қайд карда шуд, ки рушди ҷомеаи муосир бе иштироки фаъол ва баробарҳуқуқонаи занон тасаввурнопазир буда, баланд бардоштани мавқеи иҷтимоиву ҳуқуқии онҳо яке аз самтҳои муҳими сиёсати иҷтимоии давлат ба шумор меравад.

Дар фарҷом иштирокчиёни барнома зикр намуданд, ки 35 соли Истиқлоли давлатӣ барои занону духтарони Тоҷикистон марҳилаи муҳими худшиносӣ, рушди имкониятҳо, таҳкими мавқеи ҷамъиятӣ ва дастовардҳои назаррас гардидааст. Занони тоҷик имрӯз дар паҳлуи мардон бо ҳисси баланди ватандӯстӣ, садоқат ба Ватан ва масъулияти шаҳрвандӣ барои таҳкими давлатдории миллӣ, ваҳдату субот ва ободиву пешрафти Тоҷикистони азиз саҳм мегузоранд.

20 августи соли 2026 дар толори «Саноатсодиротбонк» бахшида ба 35-умин солгарди Истиқлоли давлатии Ҷумҳурии Тоҷикистон конференсияи илмӣ-назариявӣ таҳти унвони «Заминаҳои таърихии расидан ба Истиқлолияти комили сиёсӣ» баргузор гардид. Дар кори конференсия Сангинзода Дониёр - муовини директор оид ба корҳои илмӣ ва таълимии Институти давлат ва ҳуқуқи Академияи миллии илмҳои Тоҷикистон, доктори илмҳои ҳуқуқшиносӣ, профессор иштирок намуда, дар мавзуи «Ислоҳоти ҳуқуқӣ ва рушди низоми қонунгузорӣ дар давраи Истиқлолият» маъруза намуд.

Дар фарҷоми конференсия дар доираи иқдоми «400 рӯзи ташаббускорӣ – иқдоми ҳизбиёни пойтахт барои таҷлили 35-солагии соҳибистиқлолӣ» барои саҳми арзанда дар фаъолияти ҳизбӣ Дониёр Сангинзода ба Сипоснома сарфароз гардонида шуд.

19 августи соли 2026 дар барномаи «Хабар»-и телевизиони «Ҷаҳоннамо» муовини директор оид ба корҳои илмӣ ва таълимии Институти давлат ва ҳуқуқи АМИТ, доктори илмҳои ҳуқуқшиносӣ, профессор Сангинзода Дониёр Шомаҳмад суханронӣ намуд. Мавзӯи суханронӣ ба қабули қатъномаи таърихии Маҷмаи Умумии Созмони Милали Муттаҳид бахшида шуд, ки тибқи он солҳои 2027–2036 ҳамчун «Даҳсолаи байналмилалии таҳкими сулҳ ба хотири наслҳои оянда» эълон гардиданд.

Профессор Д.Ш. Сангинзода таъкид кард, ки ин дастоварди бузург натиҷаи ташаббуси Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон буда, эътирофи байналмилалии сиёсати сулҳпарварии Тоҷикистон мебошад. Ҳадафи асосии Даҳсола – ташвиқи сулҳ, пешгирии низоъҳо, таҳкими муколама ва ҳамбастагии байнинаслии миллатҳо дар саросари ҷаҳон мебошад. Ин ташаббус нишон медиҳад, ки Тоҷикистон дар арсаи байналмилалӣ нақши фаъоли худро идома медиҳад ва ба рушди устувору сулҳ дар сатҳи ҷаҳонӣ саҳм мегузорад.